清清爽爽 凉拌莴笋
2024-04-28 14:40:17 - 新民晚报新民网
◆沈一珠
礼拜四下半天，上油画课个日脚，海燕叫阿拉到伊勒剑河路个工作室一道吃中饭。老清老早照片就发上来了，伊准备了带仔泥土香个笋、新新鲜鲜个蟹糊、铮铮亮个刀鱼老啥，又烧了咸肉洋山芋饭，洋山芋是象山嗰，新上市嗰，吃口糯叽叽，想想也好吃。再想想，现在日脚，搿种一喊就到、一到就有啥吃啥个朋友越来越少了，所以，一定要去嗰。
早浪向从网购平台买了新鲜小菜，想准备两只凉拌菜带拨大家一道吃。一只是冷拌黑木耳，还是早两年跟牢阿拉曾经个一只吃饭团个团长范老师学来嗰。一小把发好烧透个黑木耳切成条、一只皮蛋切碎、半只洋葱焯焯水，搿趟还多弄了一根酸黄瓜切成条，加蚝油、生抽、醋、糖、色拉油和胡椒粉，一道拌匀就好。还记得范老师特为关照过，迭只冷拌菜，皮蛋斜气要紧。啥道理勿晓得，搿句关照一直记牢嗰。
另外就是迭份丝带香莴笋了。今朝个崇明香莴笋老新鲜，一边削，一边会有水星星溅勒面孔浪向；外皮削脱，筋筋拉拉个一层也刨清爽，就是碧绿生青个芯子了，平摊勒砧墩板浪，拿香莴笋一层层刨成丝带样子——从前欢喜拿香莴笋切块或者切片，年轻个牙齿欢喜刮辣松脆；而现在牙齿勿灵了，更加欢喜刨出来个香莴笋，像煞内里结构重组过一样，口感细绵软糯。用盐腌六七分钟，冲清爽，轻轻交水捏干，摆盆子里，加盐、糖、少许葱花，少许山茶籽油加热，淋上去，一边拌一边闻着了，是清清爽爽个大热天个味道。